Este 8 de setembro, venres, en Outeiro de Rei terá lugar unha homenaxe ao poeta chairego Manuel Maria. Cando se cumpren dous anos do seu pasamento, a Fundación Manuel Maria e a Asociación Xermolos teñen xa todo preparado para lembrar ao poeta co acto "Memória da Chaira enteira".

Os organizadores convocan á xente ás cinco da tarde no camposanto de Outeiro de Rei, onde está enterrado o poeta. Estarán presentes na homenaxe Mini e Mero, do grupo A Quenlla, que recitarán a "Plegária na Campa de Santa Sabel"

Gostaba o poeta de levar sempre unha navalla, polo que o venres a navalla terá un protagonismo especial. Con navalla cortara-se o pan e o queixo presentes nesta "comuñón laica". E duas navallas serán entregadas a Mini e Mero polo seu labor de popularización da obra poética do Manuel.

Pregária na Campa de Santa Sabel

... Neste afecto

sobre a campa competente

a par do Miño, na memoria

de quen foi e será sempre

o noso amigo

e entre todos

os que estamos aquí xuntos

unha pregaria común

proclamamos

para espallala afirmando

no teu nome compañeiro

que seguiremos loitando

na lección do teu exemplo

e erguendo esta voz en alto

para sermos fieis á terra

na vontade

de querermos ser quen somos

propietarios de nós mesmos