A bonaerense Praza de Maio ateigou-se onte de manifestantes que reclamaron, como nos tempos de Videla, a aparición con vida de Júlio López, testemuña chave no xuizo que condenou a cadea perpétua ao ex xefe da policia de Buenos Aires, Miguel Etchecolatz. López, ex albanel de 77 anos, permanece desaparecido desde hai 10 dias.

A esta desaparición hai que somar outros casos que denotan a pervivéncia, cando menos en parte, da estrutura represiva criada durante o periodo da Junta Militar. O que foi presidente do tribunal que ditou senténcia de cadea perpétua contra Etchecolatz, Carlos Rozanski, foi ameazado de morte através dunha carta chegada ao seu despacho. Nesta carta advirte-se aos que "desde os cárregos do poder, non procuran xustiza, senón vinganza contra quen defenderon á Nación". Como remitente da carta aparece o "III Congreso Internacional de Vítimas do Terrorismo - Barcelona - España" e o texto intitula-se: "A verdadeira xustiza chegará". Tamén denunciaron ameazas un xuiz de Santa Fe e un fiscal tucumano, quen están a investigar delictos cometidos na época Videla.