Camilo
Co gallo do secuestro de tres empresários de orixe galega, retoma estes días o xornal a súa campaña contra o Revolución de Liberación Nacional que leva adiante o pobo de Venezuela. Artigos de opinión, novas, entrevistas, fotografías... enchen ducias de páxinas nas que describen a Venezuela como un país que vive no caos e no que o feito de ser galego outórgalle a un moitísimas posibilidades de ser secuestrado ou algo ainda peor.
Lemos o pasado día 14 un titular que non pode ser máis tendencioso:
"Máis de 700 emigrantes galegos volveron de Venezuela no 2006". Se un non le a letra pequena a conclusión é clara. Que horror! A ira antigalega destada polos hordas bolivarianas está provocando un éxodo entre os nosos compatriotas!
Debemos pararnos a ler os datos que a propia Voz ofrece:
"Do país caribeño regresaron 726 persoas, a cifra máis baixa desde o 2002, cando volveron uns 1.400 galegos" Eles mesmos recoñecen que a cifra baixou, cousa que non se explican debido á "inseguridade actual". E avisan de que as cousas poden cambiar por mor "do clima de inseguridade". Lendo isto podemos chegar a pensar que até a chegada de Chávez ao poder, Venezuela era o lugar máis seguro do mundo.
Afirma a Voz que moitos galegos, "ameazados pola inseguridade" están pensando seriamente no regreso definitivo. Non aporta ningún dato que probe esta afirmación. Ainda que conseguiron un exemplo desa masas de emigrantes aterrorizados: Manuel Negreira. O problema é que este latifundista foi un dos secuestrados. Pode ser exemplo do resto de emigrantes? Coidamos que non.
Se para a Voz as condicións en Venezuela son tan terríbeis que moitísimos galegos se ven na obriga de regresar (non importa en absoluto que o número sexa menor ca outros anos), que demo debe estar pasando no país de onde volven máis galegos? Porque Venezuela é o segundo país en número de retornados. Que país é ese de onde os galegos fuxen a fume de carozo? Será un país no que se respire un clima de violencia extrema en vilas e cidades? Será un país no que uns malvados leninistas se fixeron co poder e comezaron unha sanguenta revolución? Pois non, o país en cuestión é Suiza. Estará o goberno suizo expropiando as vacas milka e eu ainda non me enterei? Trocarán as autoridades todos os reloxos para que no canto dun cuco o que se asome a dar as horas sexa a figura de Mao? Ou, se cadra, terán tomado as rúas de Berna bandas de Suizo-Kings que impoñen as suas reglas?
E segindo con Suiza, a nova da Voz ten parágrafos que son auténtico esperpento: "Suiza, con 2.363 retornados, é o país que devolve máis galegos. Pero destaca Venezuela, que ocupa o segundo lugar en canto a número de emigrantes que decidiron regresar a Galicia" Por que? Por que destaca Venezuela? Non está no segundo lugar? Non volveron máis do triple de galegos que de Venezuela? Pois logo tería que destacar Suiza, mais, que graza ten atacar a Suiza se alí non goberna Chávez?
Mesturar delincuencia común coas políticas bolivarianas, engadir unhas gotas de chauvinismo colonial..., eis a nova receita para atacar un proceso que pon en perigo os multimillonarios benefícios dos donos da Voz.
E remato cunha pregunta, por que para a Voz é negativo o regreso de emigrantes?
Etiquetas: Venezuela |
Enviar um comentário
Nota: só um membro deste blogue pode publicar um comentário.