Unha nova etapa no ilexítimo e inxusto xuízo ao noso Líder Camarada Ahmad Sa’adat, Secretario Xeral da Fronte Popular para a Liberación de Palestina, terá lugar este 25 de novembro. A FPLP, nesta data, chama a unha ampla campaña de solidariedade e defensa do camarada Sa’adat, demandando a súa liberación, así como a liberación de todos os prisioneiros da ocupación sionista.

A FPLP chama a todos os palestinos, árabes e organizacións internacionais solidarias con Palestina para facer do 25 de novembro un día de solidariedade cos presos e levar á ocupación a xuízo.

Haberá actos en varios lugares do mundo. En Palestina, coincidindo co xuízo, celebrarase unha manifestación xunto á sede da Cruz Vermella en Gaza. Tamén terán lugar actos de protesta en Belén, Naplusa, Ramallah e noutras partes da Palestina ocupada, baixo a lenda: ‘Liberdade para o Secretario Xeral Ahmad Sa’adat e todos os prisioneiros dos cárceres sionistas’.

A este chamamento uníronse as Forzas Nacionais e Islámicas Palestinas, que exhortaron nunha declaración pública a todas as organizacións do noso pobo a participaren nas actividades para pedir a liberación inmediata de Ahmad Sa’ada, líder nacional e Secretario Xeral da FPLP, lembrando que xa pasaron máis de dous anos desde o seu secuestro. A declaración céntrase na necesidade absoluta de que todos os presos políticos palestinos sexan liberados incondicionalmente.

Abbas al-Jumman, membro da Mesa Política da Fronte de Liberación de Palestina e do Comité Nacional para a Defensa dos Presos e Detidos nos Cárceres Sionistas, instou á participación activa en accións de solidariedade co camarada Sa’adat. Fixo un chamamento ao pobo palestino a realizar accións de solidariedade cos presos e camaradas Sa’adat, Marwan Barghouthi e Mohammed Ibrahim Abu Hijleh, e esixiu que a comunidade internacional, as organizacións de dereitos humanos, a Cruz Vermella e a Liga Árabe adopten medidas para a liberación de todos os presos.