Derrubar o seu sistema, construír o noso futuro. Eis a mobilización que ADIANTE convoca para o vindeiro sábado 17 de decembro dende a Alameda compostelá, ás 18.00 horas da tarde.
Eis a trabe do momento presente. Eis a necesidade de camiñarmos con decisión tamén dende a mocidade para lle poñer couto a un sistema asentado na barbarie, esgotado, antipopular, e que está a pretender restaurarse cunha soa lóxica: que quen acumula a riqueza (detentada, como sabemos, por poucas mans) tire máis lucro do contexto de crise actual. A ansia de lucro da nosa burguesía é, e será, insaciábel. E pouco lle importa a miseria material e psicosocial á que nós fomos condenados e condenadas. Pola contra, a principal preocupación da mocidade traballadora, consciente da necesidade de rachar cun sistema configurado contra a nosa propia existencia, é atoparmos as fórmulas para saltarmos do tren en marcha da historia. Procurar o xeito de empezarmos dende agora a construír con ilusión, con paciencia e sobre todo, con insistencia, o noso propio futuro. Todo o que hoxe está a pasar, neste estado de indignación permanente que conmove aos pobos traballadores do mundo, e neste contexto de resposta popular antisistémica dende Portugal á Grecia, pasando por Galiza, demostra que ese outro mundo, esa outra sociedade, é máis do que nunca posíbel. É máis do que nunca necesaria.
Temos que saír á rúa a visibilizar o malestar das camadas populares do País con este sistema, que só serve a unha minoría. Debemos ocupar e utilizar todos os espazos públicos como punto de encontro no que comezarmos a poñer en común as fórmulas de construír ese novo sistema que queremos: onde os traballadores e traballadoras decidan o seu propio destino, onde a maioría social sexa radical e realmente libre, onde se disolvan á fin as marcas seculares do patriarcado e da dominación sobre as mulleres. Un novo sistema construído dende as moitas xeografías que xa están en marcha. Construído dende e para unha Galiza cultural e lingüísticamente emancipada e polo tanto independente. Un sistema que defenda a nosa terra como un ben común indispoñíbel. Unha nova sociedade onde se abatan un a un os muros da exclusión que someten a traballadores e traballadoras estranxeiras, ás persoas con diversidades funcionais, ás diversas identidades sexuais que teñen que se construír á fin libremente.
Un sistema social e económicos ao servizo dunha sociedade recoñecida en si, aberta. Constituída en base a unha democracia real, ás decisións colectivas en defensa do que é de todas e todos. Unha sociedade cun profundo sentido do que o socialismo é e debe ser: a única forma de evolución política, social e económica cara a igualdade radical de todas e todos nós.
Porémonos mans á obra neste diálogo e neste loita popular contra o agora. Contra o discurso único do Capital. Contra o discuros único das Metrópoles. Esta manifestación nacional é a achega que ADIANTE fai a todo este proceso. Agardamos que sexa ben acollida por todas e todos vós, e agardamos que o 17 de decembro nos vexamos todas e todos nas rúas de Compostela. |
Enviar um comentário
Nota: só um membro deste blogue pode publicar um comentário.