Telesur
Nixerianos encetaron esta segunda feira unha folga xeral indefinida nas principais cidades de Nixeria en protesta contra o aumento da gasolina. O Parlamento exixiu ao Goberno que de marcha atrás na súa decisión para evitar o paro, convocado polos principais sindicatos da nación africana.
O Congreso de Sindicatos (TUC) e o Congreso do Traballo de Nixeria (NLC) chamaron a folga indefinida, con grandes manifestacións, se o Goberno nixeriano non restabelece o subsidio aos prezos do carburante.
A suspensión da axuda económica o pasado 1 de xaneiro provocou que o prezo da gasolina se disparase de 0,40 dólares a 1,30 o litro, co consecuente medre do custe da grande maioría de produtos e servizos, especialmente o transporte.
Perante a convocatoria de folga, a Policía de Nixeria despregou máis de 23 mil axentes en boa parte do país para impedir posíbeis disturbios. Medios locais informaron que o país vive unha forte tensión, despois de que a semana pasada as autoridades foran acusadas de mataren un manifestante durante unha protesta contra o aumento da gasolina.
O presidente nixeriano, Goodluck Jonathan, explicou nun discurso televisada que a decisión de eliminar os subsidios forma parte dun paquete de medidas de axuste. Estas medidas inclúen a redución do 25% do salario base dos empregados públicos e recortes nos gastos sociais.
Este domingo, o Parlamento de Nixeria reclamou o Goberno, nunha votación extraordinaria, que mantivese o subsidio da gasolina e abrise un diálogo sobre o tema. Nixeria, o país máis poboado de África con máis de 150 millóns de habitantes, é o principal produtor de petróleo no continente. Os cidadáns deste país consideran que é un dereito ter un prezo baixo na gasolina por ser unha nación moi rica en petróleo.
O paro desta segunda feira prodúcese nun contexto de inseguridade polos últimos ataques contra igrexas cristiás no norte do país, de maioría musulmá, atribuídos ao grupo islámico Boko Haram. |
Enviar um comentário
Nota: só um membro deste blogue pode publicar um comentário.