A Patronal non apareceu o martes 15 na reunión que ian ten cos representantes sindicais. Deu o mesmo que a CUT deixara a mesa de negociación para facilitar deste xeito o acordo, ao ser usada esta central pola Patronal como escusa para impedir unha saída negociada. Os cortes de tráfico foron esgrimidos polos empresários como causa da non comparecéncia.
Ante este novo desplante, os folguistas do naval ocuparon o edifício administrativo da Xunta de Galiza, nunha demostración do poder co que conta a clase obreira cando esta actua organizada e decididamente. Mentres miles de expedientes voaban desde as fiestras, os obreiros obrigaban a retirar as bandeiras española e da Unión Europea, deixando só a bandeira da Galiza. O interior do edifício foi inzado de pintadas chamando a unha Folga Xeral e denunciando o fascismo dos empresários.
O comportamento do naval vigués está a constituir un exemplo para o conxunto da clase traballadora galega, as perdas económicas dos obreiros non están parando a loita que, dia a dia, colle máis pulo e que poderia ampliar-se a todo o metal da província. Xa son oito os traballadores detidos pola policia, un deles estivo a piques de ser arrolado polo esquirol conductor dun autobus que non quixo deter-se ante un piquete informativo. Este feito, o do conductor, está sendo unha das maiores armas terxiversadores da imprensa, vendendo a história como a dun pobre conductor de autobús que tivo que padecer as iras dos violentos obreiros do naval en folga.
Demostra-se, máis unha vez, o dobre raseiro dos media no tratamento das protestas laborais. Mentres que a digna loita dos traballadores de Delphi recebe un tratamento correcto, ou cando menos non criminalizador, as mobilizacións na Galiza son atacadas sen piedade. Uns teñen famílias as que defender, e todo un povo apóia as reivindicacións; na Galiza, pola contra, sempre somos uns amantes da violéncia que imos contra os intereses xerais do povo... Evidentemente nisto non teñen nengunha culpa os obreiros andaluces que libran unha digna loita. Galiza cumpre un rol moi determinado na estrutura do Reino de España, e os poderes imperialistas non están dispostos a que mude.
Nesta batalla do naval, conseguir un acordo digno e que sexa respeitado pola Patronal vai depender de que non diminua o nível de loita. Nen un paso atrás!
Etiquetas: GZ |
Enviar um comentário
Nota: só um membro deste blogue pode publicar um comentário.