Fontes: SANA e PressTV

Hoxe xoves 30, milleiros de persoas participaron nunca masiva manifestación en Damasco para protestar pola acción terrorista do imperialismo norteamericano que acabou coa vida de oito civís sirios, catro nenos e catro obreiros da construción. O ataque norteamericano levouse a cabo contra unha granxa de Abu Kamal o pasado domingo.

Os manifestantes, entre os que había estudantes, mulleres, organizacións relixiosas, partidos políticos e sindicatos, expresaron a súa condena a este atroz crime contra civís. Sinalaron que esta agresión é unha violación das leis e normas internacionais e un xeito sistemático de terrorismo exercido pola administración norteamericana na rexión árabe.

Esixiuse á comunidade internacional que puxera fin a esta temeraria arrogancia dos Estados Unidos, apelando aos amantes da paz e ás organizacións internacionais a que condenen esta nova demostración de terrorismo e a adoptar os procedementos necesarios para levar aos tribunais a uns agresores que demostran o seu desprezo ás leis internacionais.

Os manifestantes, que portaban pancartas nas que se podía ler “Non ao terrorismo americano” ou “Democracia norteamericana = matanza de civís en Abu Kamal”, corearon consignas como «Colonialistas, escoitade, o pobo de Siria nunca se axeonllará». A embaixada dos Estados Unidos permaneceu pechada todo o día de hoxe.