Michel Collon
28/12/08

Entre as moitas mensaxes que me chegan, un pequeno número quere defender a Israel invocando este ou aquel comportamento palestino. Esta é, en poucas verbas, unha resposta breve.

Coido que sempre hai que ir ao punto de partida: Israel é un Estado colonialista que botou aos palestinos da súa terra en 1948. Nega a súa volta, algo que, porén, non sería máis que o respecto dun dereito.

Coas súas colonias, este Estado racista non deixa de practicar a limpeza étnica para continuar aumentando o seu territorio. Viola todas as resolucións da ONU desde hai sesenta anos, sabéndose protexido por Europa e os Estados Unidos. Estes precisan dun xendarme no Medio Oriente para controlar o petróleo. Israel láiase das eventuais armas nucleares dos seus veciños, pero el mesmo conta con duascentas cabezas nucleares, instaladas de xeito totalmente ilegal.

Israel preténdese «a única democracia no Medio Oriente» (como se un réxime de apartheid puidera ser democrático!). Porén, aliados de Israel no Medio Oriente (Arabia Saudita, Kuwait, Exipto...) son abominábeis ditaduras. Ademais, cando os palestinos de Gaza ‘votaron mal’, Israel castigou con bloqueos e ataques sen fin.

Os que critican certos movementos palestinos actuais, esquecen dicir que, anteriormente, Israel fixo todo para destruír os movementos palestinos de esquerdas ou nacionalistas. Negándose sistematicamente a negociar con Arafat toda pretensión en sentido contrario.

Todo isto pode ser probado por estudos de historiadores (sobre todo israelís), declaracións de todos os máximos dirixentes sionistas e testemuños de xudeus progresistas de hoxe.

Os colonialistas láianse dos lanzamentos de foguetes e dos atentados. En efecto, todos os métodos de loita non conveñen. Mais xa que os opresores, sobrearmados, privaron aos oprimidos de todo medio de acción legal, sería moi pretensioso dicirlles como teñen que resistir.

Non haberá solución no Medio Oriente sen estabelecer unha verdadeira democracia, para todos. E así outorgar todos os dereitos aos palestinos.

Por suposto, os israelís tamén están sufrindo (de feito, padecen a discriminación racial imposta polos dirixentes israelitas). Internet permítenos abrir con todo o mundo, de aquí e alá, un debate sobre as causas reais do problema. Denunciando as medias verdades e as distorsións da historia.

Non hai paz sen xustiza!