O Centro Social Mádia Leva! e a Associaçom em defesa do Parque Rosalia, integrantes da rede “Galiza nom se vende”, organizamos este sábado 23 de Maio uma jornada reivindicativa para pararmos de uma vez por todas o esperpéntico projecto de construçom nas costas do Parque Rosalia. Às 20:00 sairá diante do Concelho uma manifestaçom e às 22:30 haverá um concerto com Mencer Vermello, Ataque Escampe e Kimuru na sala Doble Moral.

Depois de mais de 5 anos de luita contra a construçom nas costas de um dos parques mais senlheiros da cidade, parece cada vez mais perto a vitória do povo de Lugo. Nos últimos meses, a Associaçom em Defesa do Parque Rosalia e boa parte da vizinhança levam parando as obras, cortando a entrada de materiais e denunciando as contínuas ilegalidades que se estam a cometer. Esta luita está a deixar ver a impunidade com que se movem em Lugo os especuladores, com a cumplicidade das autoridades locais, a passividade da justiça e o silenciamento mediático. Embora todo isto, a cidadania de Lugo continua em pé para evitar este novo atentado urbanístico.

O presidente da Associaçom en Defesa do Parque Rosalia apresentou onte sendas denúncias no julgado de guarda e a Delegaçom de Cultura. No texto, Marcos Bourio di que se realizam trabalhos no antigo Sanatório Portela, um prédio catalogado, e na leira lindeira cara ao final da rua Jacobe III. Todo isso, assegura, sem o preceptivo permiso da Conselharia de Cultura. Di que nom há cartaz no qual conste o número de licença, arquitecto e as obras a executar. Na mesma denúncia sinala-se que a Lei de Património Cultural de Galiza estabelece a protecçom da contorna dos prédios catalogados. Nos escritos presentados no Julgado e na Conselharia de Cultura, solicita-se a adopçom das «medidas correctoras oportunas para evitar a total deterioraçom da devandita zona emblemática».

LEMBRAMOS:

MOTIVO: Na defesa do Parque Rosalia. Sábado, 23 de Maio de 2009
HORA: 20:00 h, manifestaçom diante do Concelho
HORA: 22:30 h, concerto de Mencer Vermello, Ataque Escampe e Kimuru na sala Doble Mora