Se o pasado día 5 de outubro falabamos da loita dos traballadores de Talleres Cachaza en Ferrol, hoxe temos que denunciar a situación doutra empresa cunha delegación na estrada de Catabois, tamén en Ferrol, e sede en Cedeira, chamada Ferralla Perblago S.L.
Os traballadores desta empresa están sen traballo e sen cobrar o seu salario dende setembro.
Teñen pechado o taller, posto que a empresa acordou enviar aos seus traballadores para casa despois de concederlles un permiso retribuído, fai xa tres semanas, a espera de buscar solución ao problema que a mesma empresa creou. Como nunha chea de casos máis nos nosos días, esta “solución” pasa por entrar nun Expediente de Regulación de Emprego.
Os traballadores esixen o pago dos salarios que se lles deben. Temen que esta situación se prolongue aínda máis e reclaman que se solucione o problema o máis rápido posíbel, polo menos para poder cobrar a prestación de desemprego.
Esta delegación ferrolá de Ferralla Perblago contaba con 14 traballadores, dos que actualmente quedan 7 sufrindo esta situación.
“PECHARON E NON PAGARON!!! SOLUCIÓN XA!!” son os lemas que figuran nas pancartas das portas do taller. Desde aquí, o noso apoio e solidariedade. Adiante a Clase Obreira!
|
Solidaridade cos obreiros de Perblago, outras víctimas do despotismo da patronal. Tristemente cada día pasa máis isto: Obreiros á rúa con nóminas sen pagar mentres os empresarios están tranquilamente nas súas casiñas agardando que pase o temporal. Despois crearán unha nova empresa con outro nome, e a nome dalgún amiguete ou familiar, e a seguir explotando... Os traballadores temos que tomar conciencia desta situación, coñecer ben a lei, empregar os sindicatos de clase como arma de loita, e non dar un só respiro a estes piratas.
Organización e loita son o camiño para vencer.