CIG Saúde
O PP non para de privatizar a Sanidade Pública galega. Sobre o novo hospital de Vigo o último esperpento é que a Xunta contratou a unha xestoría privada para que decida cal das ofertas das empresas privadas, para construír o novo hospital, resulta mellor. Con isto e tendo "bos amiguete$" o pastel ten bo reparto e os favores se pagan pola porta de atrás.
Outra mais, a privatización do servizo de citas do SERGAS custará 2 millóns de euros anuais A empresa que leve este servizo 902 recibirá chamadas desviadas dos centros sanitarios e utilizará a propia rede corporativa da Xunta.
A licitación saíu no DOG o 30 de agosto, a empresa privada que leve este servizo empregará as ferramentas informáticas que lle proporcione a Xunta, así como a rede corporativa de telefonía do Goberno galego, que aportará tamén os medios telefónicos necesarios para a prestación do servizo e asumirá os custes de instalación da solución telefónica e da facturación do servizo.
Os contratos que se fagan serán temporais e a media xornada. Todos eles son a tempo parcial, cunha xornada de 28 horas semanais no mellor dos casos e de ata só seis horas. Este é o modelo que a Xunta quere levar a toda Galicia para mellorar a atención na sanidade pública e potenciar a austeridade, en lugar de empregar traballadores propios do Sergas.
A Xunta estima que recibirá uns 2,6 millóns de peticións de citas médicas nun ano, e pagará cada cita que dea a empresa privada a un prezo de 0,75 euros, de aí o orzamento de licitación de case dous millóns de euros, xa que as instalacións de telefonía e a rede xa será aportada pola propia Xunta.
Con eses dous millóns de euros poderíanse contratar uns 140 PSX para aliviar as xa de por sí abondosas cargas d@s actuais ou, tal e como esixía e esixe CIG-Saúde desde hai moito tempo, levar a cabo a contratación deste persoal estatutario para facer ese servizo desde o propio SERGAS, centralizando as chamadas nun número de teléfono que sería atendido por persoal da administración pública. É dicir: unha central de chamadas pública, útil, que funcione as 24 hs do día os 365 días do ano e que libere das excesivas cargas de traballo e da precarización ao actual persoal dos centros de saúde. Moito máis racional e austero que o método empregado pola señora Farjas, non?
E isto non quedará aí, tamén a alta tecnoloxía será privatizada, co que o desmantelamento da sanidade pública impulsado polo PP (Partido Privatizador) estase a converter nunha prioridade para estes yupis engominados da dereita extrema en Galiza.
NON Á PRIVATIZACION DA SANIDADE PÚBLICA |
Enviar um comentário
Nota: só um membro deste blogue pode publicar um comentário.