Europa Press
31/01/11
As comisións executivas das unións comarcais de Comisións Obreiras en Pontevedra e en Vilagarcía de Arousa manifestaron o seu "desacordo" cos termos do pacto económico e social negociado entre as direccións de CC.OO., UGT, a CEOE e o Goberno. Argumentan que se trata dun documento "desequilibrado" no que "priman máis os recortes que os novos dereitos" e que "non reúne as condicións mínimas" para ser aceptado".
Ao respecto, os secretarios xerais de CC.OO. en Pontevedra e Arousa, Xosé Luis García Pedrosa e Fernando Ramos, respectivamente, foron os primeiros en expresar abertamente a desconformidade de ambas as dúas agrupacións co ánimo de "abrir un debate público", tal e como sinalou García Pedrosa.
"Non hai unha rebelión", precisou Ramos, ao considerar que son "tan de CC.OO. como os que deciden que hai que asinar o acordo". A decisión de ambas as dúas executivas "non ten por que ter consecuencias" e xorde con ánimo de "reforzar o noso sindicato", engadiu.
Para Fernando Ramos, o preacordo de pensións que este martes ratificará en Madrid o consello confederal do seu sindicato resulta "insuficiente e limitado", ao tempo que acusou o Goberno de "chantajear" á parte sindical e á clase traballadora.
CRÍTICAS AO PSOE, AO PP E Á BANCA
O representante de CC.OO. na bisbarra arousana referiuse ao PSOE como "o inimigo" e criticou o PP por actuar, ao seu xuízo, dun xeito "calculadamente hipócrita". Tamén acusou á banca e os grandes grupos económicos de "potenciar" esta reforma en beneficio da contratación de fondos de pensións privados.
Ramos e García Pedrosa coincidiron en que "non era necesario" modificar agora o sistema de pensións polas presións internas e tanto da Unión Europea como dos mercados financeiros. "As pensións en España sempre foron un prato moi apetecible polo volume de diñeiro que moven", criticou o dirixente de CC.OO. en Pontevedra.
PULSO AO GOBERNO
Aínda que admitiu que o pacto social leva consigo "cousas positivas" que melloran a situación dos adscritos ao réxime agrario, as mulleres con fillos e os bolseiros, García Pedrosa censurou a redución das pensións, co que "se perde máis do que se gaña". Por iso, os dirixentes sindicais de Pontevedra e Arousa son partidarios de "seguir botándolle un pulso ao Gobierno, explicou Fernando Ramos, apelando a CC.OO. a continuar "negociando e premendo".
Precisamente, Ramos recordou que o próximo 19 de marzo se abordará a reforma dos convenios colectivos, polo que "aínda queda moita cera" e "vai seguir habendo a necesidade das mobilizacións".
O secretario da unión comarcal arousana de CC.OO. insistiu en que "non hai que tirar a toalla". Así, rexeitou a posibilidade da "desmobilización sindical" e de que o Goberno pretenda "vender isto como o fin da loita sindical". O seu homólogo en Pontevedra asegurou que "as conquistas se conseguen nas mobilizacións, non nas negociacións".
A pesar do tono conciliador dos comentarios destes dous membros de Comisións con palabras como "negociando e premendo",está claro que é moi positivo que persoas con cargos de responsabilidade no sindicato e mesmo executivas comarcais se desmarquen do pacto da traición á clase traballadora.Tamén é evidente que este discurso chega tarde,xa que imaxino que CCOO tanto de Vilagarcía como de Pontevedra non moveron un dedo en prol da folga xeral do pasado xoves,pero hai que quedarse co positivo,que non é outra cousa que atestiguar que algo se está movendo dentro de comisións,xa non só na militancia de base senón tamén en cargos internos.Con esta parte dos sindicatos españois hai que conseguir aínda que sexa pouco a pouco a unidade de acción.