A Executiva Confederal acordou realizar unha concentración nacional o venres día 2 e celebrar asembleas de delegados/as e concentracións en todas as comarcas o martes 6 de setembro
A Executiva Confederal da CIG vén de acordar convocar mobilizacións contra a reforma do artigo 135 da CE. Unha reforma neoliberal pactada polo PSOE e o PP que limita a capacidade do Estado na súa intervención nas políticas económicas e sociais e que atenta contra a autonomía financeira de Galiza. A CIG considera ademais que o procedemento seguido para tramitar esta reforma constitucional é absolutamente antidemocrático e reclama a convocatoria dun referendo.
A Executiva Confederal da CIG entende que esta reforma provocará o recorte do gasto social e dos investimentos públicos, que terá graves consecuencias sobre servizos públicos esenciais, como Sanidade, Educación e Ensino, e que favorecerá a súa progresiva privatización.
Por iso, acordou convocar para o próximo venres día 2 de setembro, ás 11:00 horas, unha concentración nacional diante da Delegación do Goberno da Coruña, coincidindo co pleno extraordinario que se celebrará no Congreso ese mesmo día para aprobar o texto por vía de urxencia e de lectura única.
A CIG tamén celebrará asembleas de delegados e convocará concentracións en todas as comarcas o martes día 6 de setembro, coincidindo, previsibelmente, co paso polo Senado desta reforma constitucional, para a súa ratificación definitiva por parte desta cámara.
A Executiva Confederal da CIG denuncia ademais que as reformas constitucionais que hai pendentes ou que se intentaron facer para promover o recoñecemento do carácter plurinacional do Estado ou o dereito de autodeterminación foron sistematicamente negadas, amparándose no carácter inamovíbel do texto.
O secretario xeral da CIG, Suso Seixo, lembra que foi precisamente ese o argumento utilizado para declarar aspectos do Estatuto de Catalunya, referendado polo pobo catalán, inconstitucional, “porén, ese argumento cae se quen solicita a reforma da Constitución é o capital financeiro e as potencias económicas europeas, introducindo principios neoliberais que teñen como único obxectivo protexer os intereses dese capital. Nese caso faise, por vía de urxencia e sen debate social”. |
Enviar um comentário
Nota: só um membro deste blogue pode publicar um comentário.