 Oliver Zamora Oria
Un negocio en plena expansión e xa factura nos Estados Unidos máis de CINCO MIL millóns de dólares, como se di en Cuba, por lo bajito. Cal é? Os cárceres privados. Tan ben lles vai, que a maior empresa do su tipo, Corrections Corporation of America, propuxo a 48 Estados norteamericanos mercarlles os seus centros de detención.
A CCA conta con 37 grupos de presión ao servizo dos seus intereses, sobre todo no Congreso, unha mostra do poder crecente deste sector e de como funcionan as empresas privadas nese país.
En que consiste o negocio? Por que é tan lucrativo? Os Estados deben pagarlle aos cárceres privados unha cantidade millonaria todos os anos por prestaren este servizo ao país. Calcúlase que as prisións lle custan ao pobo estadounidense máis de 1.700 millóns de dólares todos os anos, mais esta non é a vía de maior entrada de diñeiro; por lei, nos Estados Unidos as empresas privadas poden contratar a súa man de obra nos centros penitenciarios, e iso si é un negocio redondo. Fíxense... nas prisións non hai folgas, os reos están dispoñíbeis o tempo necesario, non se pagan horas extras nin vacacións, non hai chegadas tarde nin problemas familiares, e o salario, o máis estimulante para os xerentes, consiste en centavos a hora. Segundo algúns analistas, esta man de obra barata estimula os investimentos e o regreso de moitas empresas que deixaron o país para investiren en Asia.
O peso produtivo? Consonte estudos, na pasada década as prisións produciron o 100% dos cascos militares, porta municións, chalecos blindados e outros aditamentos militares. O todopoderoso Complexo Militar Industrial seica é un cliente importante, mais non o único. As prisións tamén teñen entre os seus clientes ás compañías dedicadas á industria lixeira, utensilios domésticos e material de oficina. Escravitude legalizada en pleno século XXI na maior democracia do mundo. Se iso foi na década pasada, e o auxe rexístrase nos últimos anos, é de supoñer que a demanda de man do obra barata, no medio da crise, sexa maior á altura de 2012.
Nos últimos anos, os donos dos cárceres privados viron nos indocumentados a galiña dos ovos de ouro. Segundo algunhas ONGs proinmigrantes, estes señores gastaron entre 1999 e 2009 máis de 20 millóns de dólares en intrigar para lograren máis leis contra os indocumentados, inclusive, foron un dos grandes patrocinadores da famosa lei en Arizona, que posteriormente chegou a outras rexións do país.
Ao ano arréstanse 400 mil inmigrantes, quen van parar a prisións federais ou estatais, privadas ou públicas. Este bon negocio explica, en parte, por que os Estados Unidos teñen o 25% da poboación carceraria do planeta. A ecuación é moi simple: máis presos... máis cartos. |
Enviar um comentário
Nota: só um membro deste blogue pode publicar um comentário.