O goberno de California está a un paso de derrogar a lei, aprobada no apoxeo do McCarthismo, que permite o despedimentos do profesorado das escolas e colexios públicos membros do Partido Comunista. Malia pasar desapercibida polos principais medios de comunicación, non foi así para o conservador Fox News e o ultradereitista New York Sun, que avisan de que a derrogación "promoverá o comunismo nas escolas públicas".

O proxecto de lei, proposto polo senador demócrata de Long Beach, Alan Lowenthal, eliminaría tamén no estado o xuramento de fidelidade. A día de hoxe, os empregados públicos están obrigados a facer xuramento de non pertencer a ningunha organización "que avogue polo uso da forza ou violencia para derrocar ao goberno dos EEUU" ou do estado de California.

Co apoio dos dous grandes sindicatos de docentes de California, a Federación de Profesores de California e a Asociación de Profesores de California, o proxecto de lei foi aprobado nunha primeira comisión este 2 de abril. O control dos demócratas en ambas as dúas cámaras nesta lexislatura fai máis que probábel a súa aprobación final.

Iso si, segundo unha fonte do senado citada por AP, o proxecto de lei seguiría permitindo despedir aos empregados públicos que defendan o derrocamento violento do goberno, como tamén aos profesores que favorezan entre os estudantes "unha preferencia polo comunismo".

Porén, a cadea Fox Nexs citou a un "crítico" co proxecto, que declarou que, "nun momento no que os estudantes de California están loitando por superar os exames, o senador Lowenthal fala de comunismo, o sistema de goberno responsábel da morte dun cento de millóns de persoas". O “crítico" díxolle a Fox News que, “o comunismo continúa a ser unha ameaza para nós". Tamén o New York Sun, nun editorial titulado “A California comunista", citou a outro "experto" que falou do proxecto como “Unha lei de rehabilitación e revisión do comunismo".

David Cole, profesor de dereito en Georgetown, declarou a AP que o Tribunal Supremo "xa hai moito tempo que se pronunciou contra a actual lei que viola a Primeira Emenda, o dereito á asociación e ao emprego dos membros do Partido Comunista. A culpabilidade por asociación nunca está xustificada".

A última persoa en California que foi despedida do seu posto de profesora por pertencer ao Partido Comunista foi Angela Davis, expulsada do Departamento de Filosofía da Universidade de California en 1969. Hoxe dirixe a cátedra de Estudos Afroamericanos e Feministas en Santa Cruz.